Na Caleya Pravia 03-12-06

Poníase rumbu a Pravia el domingu a les 14:30 hores (n´esta vegada con puntualidá y too, tamos que nos salimos) bastantes dixebriegos con munches ganes de ver al nuesu equipu ganar n´un campu que munchos de nos nun conocíemos aunque dalgunos dixebriegos ya habién tirao pa Pravia pela mañana pa aprovechar el díi ya xintar ellí comu buenos “gourmets” (dalgunos desechamos esta opción viendo que en Pravia nun había “pan gallegu” comu en Tapia J ).

Llegá a Pravia (pueblu hermanáu con el pueblu bretón de Pont Scorff, esto ye cultura y lo demás tonteríes) onde la lluvía yera protagonista y tras la visita al Complexu Deportíu d´Agones (nun ye que nos hubiesemos perdío, ta too controlao) onde se fae el Derrame Rock agora y unes cuantes preguntes pa llocalizar el campu bien (pocu más y comenos), aparquemos los coches onde se pudo ya metímonos nel coquetu campu de Santa Catalina que causo furor entre los dixebriegos que lu comparaben colos campos ingleses pola forma la grada y la techumbre, a la par de tar muy cerca del terrenu de xuéu. Entrá única de 10 €uros y pa dientru tando la grada petá de xente, tantu de Pravia comu de Llangréu onde respirabase bon ambiente de fúbol.

Haciendo gala d´esi parecíu con England, el partíu entamo con puntualidá inglesa y tras el pitíu inicial xuntanos toos na grada ya entamamos a animar a los nuesos con más ganes que nunca, y ye que les ganes de victories van subiendo partíu a partíu entre tolos que seguimos al Unión xuegue onde xuegue.

Rises, cancios, buen xuéu del Unión y a los 10 minutos primer sustu y primera decepción: gol del Pravia a balón paráu na única ocasión que habíen tenío.Otrá vegada les xugaes a balón paráu ficieronnos dañu y esto hay que camudalo.

Retomase´l partíu y los nuesos ponen-y más ganes tobía de ganar faciendo buenes xugaes y sobre too munches ganes, actitú que merecía el apoyu dende la grada y pa eso tabemos ellí los dixebriegos. Destacar d´esta parte que se nos anuló un gol de Gustavo por una supuesta falta previa de Miguélez, de cuntao esti gol les coses de xuru que hubieran camudao muncho de cara´l resultáu final.

Llegose al descansu con estí resultáu y dalgunos aprovecharon la coyuntura pa dir a “aclarar” les gargantes al chigre del campu mientres algunu daba clases de comu se tien que bailar la música ochentera mientres suanaba el “Seré tu amante bandido” de Miguel Bosé na megafonía del campu llevandose esti ultimu personaxe los aplausos del “respetable”. Alcordai-vos de comu hay que facelo: pierna pa un lláu manes pal otru.

Pitíu inicial de la segunda parte ya a tornar a animar al Llangréu que ye lo nueso colos nuestros xugaores de nuéu a un rítmu muy altu y otra vegada más con ocasiones clares.

El gol del Unión llegaría con un tremendu centru de Carly que Miguélez cabecea al fondu la portería faciendo dar un brincu a tolos llangreanos na grada que tabemos viendo que el gol tenía que llegar n´algún momentu. Siguién les ocasiones nueses pero nun había manera de que´l balón tornara a rebasar la llínia de la portería praviana a pesar de les ganes ya el esfuerzu que taben poniendo tolos xugaores del Unión. Una vez más la suerte nun tubo de cara. Sería al final del partíu cuando tendría llugar una de les aiciones más polémiques: forcexéu na banda entre el númberu 9 del Praviano Juanma y Ángel y l´arbitru echa-y la segunda mariella a Ángel expulsándolu de forma bastante inxusta (y más teniendo en cuenta que anteriormente esti xugaor del Praviano había escupío y pegao-y a Angel un codazu que paez ser vió tol mundiu menos los asistentes del partíu). Pero la cosa nun finaría equí si non que lluéu esti arbitruchu mandó que sacará la falta el Llangréu. Nun me pidáis que de una explicación d´esto porque nun tien ni pies ni cabeza (comu el nueve del Praviano, que tampoco tenía pescuezu).

Final del partíu y tolos dixebriegos despedimos al equipu entre cancios y palmes recompensandoyos la per bona actitú mostrá nel encuentru y que estos respondieron tamién aplaudiéndonos a nos agradeciendonos asina l´apoyu mostráu tol partíu. Detallazu de la plantilla que una vez más agradecemos equí, presta ver qu´estes coses vienen siendo habituales últimamente, aunque la racha de resultaos del equipu nun seya la esperá. Nosotros vamos siguir animando al Llangréu y nun dexándolu solu ellí onde xuegue y teniendo los resultaos que tenga.

Comu resumen, destacar la actitú y garra que mostró el equipu nel partíu que esperemos siga asina siempres porque per esi camín tamos convencíos que van facese bien les coses. Tamién mencionar el apoyu que tuvo l´equipu en tou momento dende la grada, onde Dixebra Popular nun dexamos d´animar en nengún momentu, el equipu necesita comu diz el cancíu “agora más que nunca” l´apoyu de toos ya toes.

Axuntamosvos lo que dixo´l nuéu entrenaor Daniel Suarez na prensa llocal el martes respeutu del partíu en rellación cola animación a los nuesos, bon detelle tamién del señor Suárez.

Un 10 a tolos dixebriegos que tuvistéis presentes en Pravia por too: pol ánimu, polos cancios, peles clases de baille, y sobre too poles rises ya el bon ambiente que tuvimos, que ye colo que yo personalmente quedome del partíu. Vemonos en Llanes familia.

Salú ya la Caleya ye nuesa

[ volver ]