Na Caleya Avilés (Avilés Industrial) 11-02-07

Dempués de unes cuantes selmanes ensin poder viaxar pa ver a los nuesos fuera del Ganzábal polos partíos siguíos como llocales y el partíu suspendíu en Sotrondiu llegábase a la visita a Avilés con munches ganes de tolos dixebriegos d´animar en uno de esos partíos que ye per especial pa toos, y más esti añu pola trascendencia que tenía el mesmu pa acercáse a los puestos del ascensu que toos naguamos por ocupar cuanto antes meyor y que paez que pocu a pocu la cosa va pintando meyor.

Partíase pa Galiana a eso de les 3 y media de la tardi non si enantes sofrir unos cuantos imprevistos y con dalguna que otra baxa inesperá de última hora que nun pudo disfrutar de la victoria de los neusos con nos. Recoleuta y distribución del material pal viaxe, bombos, pancarta nueva y demás banderes y rumbu a “La villa del adelantáu” (naide sabíemos porque recibe esti nome pero queda de profesional ponelo equí, nun me digáis que non) lloviendo y con cada uno de nos faciendo cálculos de lo que podía ser el partíu y sobre too con munches ganes de esos tres puntos y lo que supondrían.

Aparcamientu nel parking de al lláu del campu y pa les taquilles a mercar eses entradines de 5 €uros que tanto nos presten, y ye que nun sabéis el dineru que pues dexate viendo al Llangréu fuera a lo llargo de la temporá, yo prefiero más nun calculalo. Nes taquilles pudimos lleer en unos cartelos la acertá campaña de captación de socios que ta faciendo el Avilés pa la seguanda vuelta baxando muncho los precios y que paez que tan buenos resultaos ta dándoyos, tedríen que tomar nota per equí d´esti asuntu.

Coloquémonos na grada selleicioná pa nos (con cinta d´esta d´obra y too, como si fuésemos ganao) desplegamos el material y entamamos a animar viendo les cares rares que nos ponía la xente d´Avilés que nun deben tar muy acostumbraos a que naide anime n´esi cementeriu, digo campu.

El partíu nun podía entamar meyor pa los nuesos intereses y alredior del minutu 10 Teto (como no) saca una falta que Miguélez remata de cabeza pa dientru de les redes de la portería del Avilés cola allegría correspondiente de tolos llangreanos ellí presentes (que yeremos unos cuantos) y del equipu y animándonos más a nos si cabe pa siguir canciando. El partíu de ehí en adelante nun ye que fuera muy vistosu pero aún asina hubo delles oportunidaes de ver gol, y ver vimoslos aunque el colexiau y los llinieres encargáronse de anulalos en dos ocasiones, una a Miguélez por supuesta mano na primera parte y otra al incombustible Pontigo na seguanda por fuera de xuéu.

Nel Suárez Puerta nun animaba ni el tato y lo único que se oía muy de vez en cuando yeren insultos facia Llangréu y facia los llangreanos aprovechando en una de estes nos la ocasión pa sacar la pancarta que teniemos prepará de “Goléis a ría” (soys unos macarras) que tan perplexos dexó a tolos avilesinos, les cares yeren un poema y nos ya sabíemos de sobra que diven a faltanos.

El equipu lluchó muchísimo por mantener el resultáu con un esfuerzu físicu enorme que nos quisimos recompensar col nuesu apoyu durante tol partíu y más sabiendo la delicá situación en la que tá la plantilla pol tema de los pagos. Paez ser que llego-yos esi apoyu porque tantu nos cambios que se ficieron como al final del partíu la plantilla despidionos con un aplausu, coses asina presten abondo y esperamos que sigan repitiéndose porque ta claro que nos nun vamos dexar d´animar porque el Llangréu ye el nuesu equipu aunque haya munchos que nun entiendan comu podemos siguir a un equipu que ta na tercera división.

A la salida dalguna que otra semeya a pesar de que dalgún avilesín negósenos a garrar la cámara (munches gracies al que nos la sacó dende equí que veíase que sabía que nel fúbol unes veces ganase y otres pierdese) y pa los coches pa tornar de nuéu a Llangréu cola sonrisa na cara dempués d´un partíu onde munchos pasamoslo mal viendo que se nos podíen escapar tres puntos tan difíciles y que tanta falta nos facíen.

Un saludu dende equí a tolos dixebriegos que nos dimos cita en Avilés y que seguru taremos tanto en Cuideiru comu en Mieres pa siguir faciendo lo que llevámos más de doce años faciendo, defender al nuesu club. Dir preparándo lo de Mieres que tien que ser polo menos polo menos tan grande como Avilés, les rises de xuru que nun faltaran mientres sigamos tando toos xuníos. Gracies a toos por otru grandísimu día en bona compañía dixebriega.

Salú ya la Caleya ye nuesa

[ volver ]