Na Caleya Tiuya 08-10-06

N´esta ocasión tocabanos dir al únicu viaxe que facemos ensin movenos de Llangréu onde nos esperaben los collacios de €lviro (nun escaecemos lo del añu pasáu), Tiuya. Esperabase un partíu per difícil n´un campu que comu toos sabéis ye d´arena y ye per piquiñu, faciendo la praútica del fúbol “una difícil empresa” comu diz la New Spain. Mercamos les entraes de xuvenil de 5 €uros ya pa dientru que nos a estos nun yos damos ni les gracies.

Les graes del Candín llenes y col públicu lócal faltandonos comu nun podía ser d´otra manera. Escolingaronse les pancartes ya banderes y entamose a animar al nuesu equipu, faltonos el bombu que n´esta ocasión quedó nel desván d´un dixebriegu pola caraja carauterística de los domigos dempués de fiesta (notose el conciertu del díi anterior, tuvimos más baxes que l´equipu por “lesión”).

Entamaba el partíu y ya entamaben los orixinales “eo eo eo Puta Langreo” por parte otra vegada más de los collacios de €lviro, notase l´incultura xeneralizá n´esta xente porque paez que nun saben en que Conceyu viven. El nuesu equipu veiase-y con más ganes que nunca de facer esborriar de les tiestes lo acontecío escontra´l Cuideiru en Ganzábal. Dominio de los nuesos y na primera falta que tenemos al borde´l área Titi fae el primer gol del partíu y vien a cellebralu ya dedicanoslu a tolos dixebriegos ellí presentes cola consiguiente allegría de toos, facía muncho que nadie tenía detalles d´estos con nos. Sigue´l partíu y los nuesos nun se conformen col resultáu y siguen teniendo la pelota y les ocasiones más clares y sería de nuéu Titi quien metiera el 2-0 nel marcador con un golazo pola escuadra izquierda dexando a tolos llangreanos (aunque yos pese) de Tiuya cola boquina bien pesllá, de nuéu nun s´olvidó de nos y volvió a dedicanos el gol (gracies). Enantes de finar la primera parte un del Tiuya ve a Pinel adelantáu y cuelai la vaselina suponiendo´l primer gol de los arlequinaos.

Descansu pa xintar ya beber lo xusto pa recuperase y dalgunos dixebriegos dando espectáculo nel campu con un balón (siguimos en forma). Entamaba la seguanda parte onde los nuesos paecíen que taben un pocu más relaxaos que al principiu. Dizse que tantu llevar el cantaru a la fonte finá rompiendo y eso fue lo que pasó, el Tiuya llogró otru gol faciendonos el empate y dexándonos a toos con cara tontos. Destacar tamién la cellebración del porteru Adrián del Tiuya con nos tamién y los continuos insultos d´esti xugaor facía nos, que culpa tendremos los dixebriegos que haya xente que va pola “mala vida” comu dicia un de los dixebriegos desplazaos. Al final la xente de Tiuya pidiendo la hora y ellos contentos pa casina col su puntin, tobia dicia dalgún jubilan que vaya robu que yos habiemos metío, exemplu claru de persona que dempués acabes preguntandote que partíu vió, ta claru que el mesmu que nos non.

Otra oportunidá más de puntuar na que perdemos 3 puntos y si tubieramos el famosu carné por puntos esi de la DGT ya nos lu hubieren quitao. Nun pue ser que el Llangréu te ya a ocho puntos de cabeza y na sétima posición porque hay equipu de sobra pa tar no más alto de la tabla y nun podemos conformanos con menos qu´eso.

De la afición del Tiuya nun tenemos muncho que dicir, meyor dedicabense a animar a los suyos y dexaven al equipu de Llangréu en paz, xunto colos “moscones” de Grau son de lo más faltoso que nos de tola categoría ya eso que somos vecinos.

Saludar tamién enantes de finar con esti “Na Caleya” al miebru de Herri Norte (hinches del Athletic de Bilbao) que tuvo con nos en Tiuya que vino a pasar un buen finde a Llangréu con motivu del conciertu y del nuesu partíu.

Vemonos comu siempres nel prósimu viaxe, será en Noreña pa ver a los nuesos escontra´l Condal y ellí comu siempres tara Dixebra Popular independientemente de los resultaos que lleve el equipu al que llevamos defendiendo más de 10 años.

Salú ya la Caleya ye nuesa

[ volver ]